Wednesday, January 16, 2013

ಝೀರೋ ಡಾರ್ಕ್ ಥರ್ಟಿ-ಆಸ್ಕರ್ ಕಣದ ಚಿತ್ರಗಳು

2001 ರಂದು ನಡೆದ ಅವಳಿ ಗಗನ ಚುಂಬಿ ಕಟ್ಟಡಗಳ ನೆಲಸಮದಿಂದಾಗಿ ಇಡೀ ಅಮೆರಿಕ ಬೆಚ್ಚಿಬಿದ್ದದ್ದು ಎಲ್ಲರಿಗೂ ಗೊತ್ತಿರುವ ಸಂಗತಿ.ಸಾವಿರಾರು ಜನರನ್ನು ಬಲಿತೆಗೆದುಕೊಂಡ ಆತ್ಮಾಹುತಿ ದಾಳಿ ಒಸಾಮಾ ಬಿನ್ ಲಾಡನ್  ನ ಕರಾಳ ಮುಖದ ಪರಿಚಯ ಮಾಡಿಕೊಟ್ಟದ್ದು ನಿಜ. ಆನಂತರ ಅಮೇರಿಕಾ ನಿದ್ರಿಸಲಿಲ್ಲ. ಬಿನ್ ಲಾಡನ್ ಮತ್ತು ಭಯೋತ್ಪಾದನೆಯ ಬೇರುಗಳನ್ನು ಹುಡುಕಿ ಹುಡುಕಿ ಬುಡ ಸಮೇತ ಕಿತ್ತುಹಾಕುವ ನಿರ್ಧಾರ ಕೈಗೊಂಡು ಅದನ್ನು ನೆರವೇರಿಸಿಕೊಂಡ ಕಥೆಯ ವಿವರ ಸುಮಾರು ಜನರಿಗೆ ತಿಳಿದಿರಲಿಕ್ಕಿಲ್ಲ. ಅದಾದ ನಂತರದ ಎಷ್ಟೋ ವರ್ಷದ ನಂತರ ಅಂದರೆ ಹತ್ತು ವರ್ಷದ ನಂತರ ಬಿನ್ ಲಾಡನ್ ನನ್ನು ಪಾಕಿಸ್ತಾನದ ಅಡಗುಮನೆಯೊಂದರಲ್ಲಿ ಕೊಲೆ ಮಾಡಿ ಅವನ ಶವವನ್ನು ಸಮುದ್ರಕ್ಕೆ ಬೀಸಾಕಿದ ಸುದ್ದಿ ಬಂತಷ್ಟೇ. 
ಅದು ನಡೆದುದರ ಬಗ್ಗೆ ಸಾಕ್ಷ್ಯಚಿತ್ರವೊಂದು ಇದ್ದರೂ ಅದರಲ್ಲಿ ಅಂತಹ ಹೇಳಿಕೊಳ್ಳುವಂತಹ ಆಧಾರಗಳಿಲ್ಲ. ಸಾಕ್ಷ್ಯಗಳಿಲ್ಲ. 
 ಕ್ಯಾಥರಿನ್ ಬೀಗ್ಲೋ  ನಿರ್ದೇಶನದಲ್ಲಿ ಝೀರೋ ಡಾರ್ಕ್ ಥರ್ಟಿ ಚಿತ್ರದ ಕಥೆಯ ವಸ್ತು ಬಿನ್ ಲಾಡನ್ ನ ಬೇಟೆಯ ಕುರಿತಾದದ್ದು. ಅಮೆರಿಕಾದಲ್ಲಿ ನಡೆದ ಬಾಂಬ್ ಸ್ಫೋಟದ ನಂತರ ಅವನನ್ನು ಹುಡುಕಿಕೊಂಡು ಹೋಗುವ ಅಮೆರಿಕಾದ ಇಂಟೆಲಿಜನ್ಸ್ ಪಡೆಯ ಕಾರ್ಯ ವೈಖರಿಯ ವಿವರಗಳನ್ನು ಎಳೆಎಳೆಯಾಗಿ ಬಿಡಿಸುವ ಚಿತ್ರ ನಿಜಕ್ಕೂ ತುಂಬಾ ಪರಿಣಾಮಕಾರಿಯಾಗಿದೆ.
ಇಡೀ ಚಿತ್ರ ಸಾಕ್ಷ್ಯ ಚಿತ್ರದ ಮಾದರಿಯಲ್ಲೇ ಇದೆ. ದೃಶಿಕೆಯ ಸಂಯೋಜನೆ, ದೃಶ್ಯದ ಚಿತ್ರೀಕರಣ ಎಲ್ಲವೂ ಯಾರೋ ಕೆಮೆರಾ ತೆಗೆದುಕೊಂಡು ನಡೆಯುತ್ತಿರುವ ದೃಶ್ಯಾವಳಿಯನ್ನು ನಿಜವಾಗಿಯೂ ಚಿತ್ರೀಕರಿಸುತ್ತಿದ್ದಾರೇನೋ ಎನ್ನುವ ಭಾವ ಮೂಡಿಸುತ್ತದೆ. ಅಷ್ಟೇ ಅಲ್ಲ. ಚಿತ್ರದ ಪಾತ್ರಧಾರಿಗಳೂ ಅಷ್ಟೇ. ತಾವೇ ಪಾತ್ರದಲ್ಲಿ ಲೀನವಾಗಿ ಅಭಿನಯಿಸಿದ್ದಾರೆ.
ಚಿತ್ರದ ಪ್ರಾರಂಭ ಭಯೋತ್ಪಾದಕರ ಸಹಾಯಕನನನೊಬ್ಬನನ್ನು ಹಿಂಸೆ ಕೊಟ್ಟು ಬಾಯಿ ಬಿಡಿಸುವ ಚಿತ್ರಣದ ಮೂಲಕ ತೆರೆದುಕೊಳ್ಳುತ್ತದೆ.ಅದೆಷ್ಟು ಪರಿಣಾಮಕಾರಿಯಾಗಿದೆಯೆಂದರೆ 'ಇದೆಲ್ಲಾ ಮನುಷ್ಯರಿಗೆ ಬೇಕಾ ' ಎನಿಸುವಷ್ಟರ ಮಟ್ಟಿಗೆ ದೃಶ್ಯದ ಚಿತ್ರೀಕರಣವಿದೆ. ಅಲ್ಲಿಂದ ತೆರೆದುಕೊಳ್ಳುವ ಚಿತ್ರ ಮುಂದೆ ನಾಗಾಲೋಟದಲ್ಲಿ ಮುಂದುವರೆಯುತ್ತದೆ. ಅಲ್ಲಲ್ಲಿ ಬಾಂಬ್ ಸಿಡಿಯುವುದು, ಇತ್ತ ಭಯೋತ್ಪಾದಕರ ಪಟ್ಟಿ ಹಿಡಿದುಕೊಂಡು ಅವರ ಬೇಟೆಗೆ ಓಡಾಡುವುದು ಮುಂತಾದವುಗಳನ್ನು ತುಂಬಾ ಚೆನ್ನಾಗಿ ಬೆರೆಸುತ್ತಾ ಚಿತ್ರವನ್ನೂ ಕುತೂಹಲಕಾರಿಯಾಗಿ ಮಾಡಿದ್ದಾರೆ ನಿರ್ದೇಶಕಿ. ಬಾಂಬ್ ಸ್ಫೋಟಗಳನ್ನು ಎಲ್ಲೂ ನೇರವಾಗಿ ತೋರಿಸದ ನಿರ್ದೇಶಕರು ಅದನ್ನು ಸುದ್ಧಿವಾಹಿನಿಯ  ಪ್ರಸರಣದಲ್ಲಿ ನಿರೂಪಿಸುತ್ತಾರೆ. ಆದರೆ ಬೇಟೆಯ ಹಂತದಲ್ಲಿ ನಡೆಯುವ ಹೊಡೆದಾಟ ಗುಂಡಿನ ಚಕಮಕಿಯನ್ನು ತುಂಬಾ ನೈಜವಾಗಿ ನಿರೂಪಿಸಿದ್ದಾರೆ. ಪಾಕಿಸ್ತಾನ, ಆಫ್ಘಾನಿಸ್ತಾನ ಅಮೇರಿಕಾ ಮುಂತಾದ ಕಡೆಗಳಲ್ಲಿ ಹತ್ತು ವರ್ಷಗಳಲ್ಲಿ ನಡೆಯುವ ಕಥಾ ಹಂದರದ ಚಿತ್ರ ಮಹಿಳೆಯ ಅಂದರೆ ನಾಯಕಿಯ ದೃಷ್ಟಿಕೋನದ ಮೂಲಕ ನಿರೂಪಿತವಾಗಿದೆ.  ಅಮೆರಿಕಾದ ರಾಜಕೀಯ ಪರಿಸ್ಥಿತಿಯ ಗೊಂದಲವನ್ನೂ ಅಲ್ಲಲ್ಲಿ ಸೂಕ್ಷ್ಮವಾಗಿ ಬಿಚ್ಚಿಡುವ ಕಥೆ, ಸೈನಿಕರ ನಡವಳಿಕೆ, ಅವರ ಸೂಕ್ಷ್ಮತೆ ಕಾರ್ಯ ತತ್ಪರತೆ ಎಲ್ಲವನ್ನೂ ವಸ್ತುನಿಷ್ಠವಾಗಿ ವಿಶದಪಡಿಸುತ್ತದೆ.
ಮಧ್ಯರಾತ್ರಿ ಹನ್ನೆರೆಡುವರೆ ಘಂಟೆಯ ಸಮಯವನ್ನ ಸೇನಾ ಭಾಷೆಯಲ್ಲಿ ಝೀರೋ ಡಾರ್ಕ್ ಥರ್ಟಿ ಎನ್ನುತ್ತಾರೆ. ಅದೇ ರೀತಿ ಮಧ್ಯರಾತ್ರಿಯಲ್ಲಿ ನಡೆಯುವ ಬಿನ್ ಲಾಡನ್ ಹುಡುಕಾಟದ ಸೈನಿಕ ಕಾರ್ಯಾಚರಣೆ ತುಂಬಾ ರೋಚಕವಾಗಿ ಮೂಡಿಬಂದಿದೆ.
ಚಿತ್ರದ ಕೆಲವು ದೃಶ್ಯಗಳು ತುಂಬಾ ಪರಿಣಾಮಕಾರಿಯಾಗಿದೆ. ಅವುಗಳಲ್ಲಿ ಸೈನಿಕರು ಬಿನ್ ಲಾಡನ್ ನನ್ನು ಕೊಂದ ನಂತರವೂ ಆತನೋ ಇಲ್ಲವೋ ಎಂದು ಖಾತರಿ ಪಡಿಸಿಕೊಳ್ಳಲು ಒದ್ದಾಡುವುದು, ಬಿನ್ ಲಾಡನ್ ಅವಿತಿದ್ದಾನೆ ಎಂದು ಗೊತ್ತಾಗಿ, ಅದರ ವರದಿ ಸಲ್ಲಿಸಿದ ಮೇಲೂ ದಿನಗಟ್ಟಲೆ, ಘಂಟೆಗಟ್ಟಲೆ ತಿಂಗಳುಗಟ್ಟಲೇ ಅದರ ಬಗ್ಗೆ ಏನೂ ಕ್ರಮ ಕೈಗೊಳ್ಳದ ಸರ್ಕಾರದ ನಿಲುವಿನಿಂದಾಗಿ ನಾಯಕಿ ಹತಾಷಳಾಗುವುದು, ಅಂತಿಮ ಹಂತದ ಕಾರ್ಯಾಚರಣೆಯಲ್ಲಿ ವಿನಾಕಾರಣ ಗುಂಡಿನ ದಾಳಿಗೆ ಬಲಿಯಾಗುವ ಮಹಿಳೆಯರನ್ನು ಕಂಡು ಕಸವಿಸಿಯಾಗುವ ಸೈನಿಕರು ಮುಂತಾದವುಗಳು ನಿಜಕ್ಕೂ ಚಿತ್ರದ ಪ್ರಮುಖ ದೃಶ್ಯಗಳು ಎನ್ನಬಹುದು.
ತೀರಾ ವಸ್ತುನಿಷ್ಠವಾಗಿರುವ ಒಂದು ರೋಚಕ ಇತಿಹಾಸದ ಅವಗಾಹನೆ ಮತ್ತು ಒಂದು ಅತ್ಯುತ್ತಮ ಸಾಕ್ಷ್ಯಚಿತ್ರ ಮಾದರಿಯ ಥ್ರಿಲ್ಲರ್ ನೋಡುವ ಮನಸ್ಸಿರುವವರು ಒಮ್ಮೆ ನೋಡಲೇಬೇಕಾದ ಚಿತ್ರ ಝೀರೋ ಡಾರ್ಕ್ ಥರ್ಟಿ.
ಈ  ಚಿತ್ರ ಈ ಸಾರಿಯ ಆಸ್ಕರ್  ಕಣದಲ್ಲಿ ಅತ್ಯುತ್ತಮ ಚಿತ್ರ , ಅತ್ಯುತ್ತಮ ನಿರ್ದೇಶಕಿ, ಅತ್ಯುತ್ತಮ ನಟಿ ಸೇರಿದಂತೆ ಐದು ವಿಭಾಗಗಳಲ್ಲಿ ನಾಮಾಂಕಿತಗೊಂಡಿದೆ.
ಓದಿ ಮೆಚ್ಚಿದ್ದು:
ಬಿದಿರಿನ ದೊಡ್ಡ ಲೋಟದಲ್ಲಿ ರಾಗಿಯ ಕಾಳನ್ನು ತುಂಬಿಸಿ, ಬಿಸಿನೀರನ್ನು ಸೇರಿಸಿ, ಬಿದಿರಿನದ್ದೇ ಸ್ಟ್ರಾದಲ್ಲಿ ಹೀರುವ ನೋಟ "ಸಿಕ್ಕಿಂ"ನ ಲೋಕಲ್ ಬಾರ್-ಗಳಲ್ಲಿ ಕಾಣಸಿಗುತ್ತದೆ. ಲೋಟದಲ್ಲಿ ನೀರು ಖಾಲಿಯಾದರೆ ಇನ್ನಷ್ಟು ಬಿಸಿನೀರು ಸೇರಿಸಿ ಹತ್ತು ನಿಮಿಷ ಬಿಟ್ಟರೆ ಮತ್ತೆ "ಛಾಂಗ್" ಸಿದ್ಧ. ರಾಗಿ ಕಾಳಿಗೆ ಬಿಸಿನೀರು ಸೇರಿಸಿದರೆ ಅದ್ಯಾವ ಮಹಾನ್ ರುಚಿ ಎಂದು ನೀವು ಕೇಳಬಹುದು.  ನೋಡಲು ನಾವು ಮನೆಯಲ್ಲಿ ಬಳಸುವ ರಾಗಿಯ ಕಾಳಿನಂತಿದ್ದರೂ, ಈ ರಾಗಿಯ ಕಾಳಿನ ಹಿಂದಿನ ಕಥೆ ಬೇರೆಯೇ ಇದೆ.
ಈ ಬ್ಲಾಗ್ ನಲ್ಲಿ ಇನ್ನೂ ಸುಮಾರಿ ಇಂಟೆರೆಸ್ಟಿಂಗ್ ಎನಿಸುವ ಬರಹಗಳಿವೆ. ಹಾಗೆ ಚಿತ್ರಗಳೂ ಇವೆ.ಕಥೆ. ಲಲಿತ ಪ್ರಬಂಧ , ಹಳ್ಳಿಯ ಚಿತ್ರಣ, ವಿವಿಧ ಜನರ ರಾಜ್ಯಗಳಡೆಗಿನ ಪರಿಚಯ,ಹಕ್ಕಿ, ಪ್ರಾಣಿ, ಪಕ್ಷಿ.. ಹೀಗೆ ಸಾಕಷ್ಟು ವಿಷಯಗಳೇ ಅಡಕವಾಗಿವೆ. ನಾನಂತೂ ಇಲ್ಲಿರುವ ಚಂದನೆಯ ಫೋಟೋಗಳನ್ನು ಕಣ್ತುಂಬಿಕೊಂಡಿದ್ದೇನೆ.ನೀವು ಒಮ್ಮೆ ಬೇಟಿ ಕೊಡಿ. .ಅಂದಹಾಗೆ 
ಅನುಭವ ಮಂಟಪ  ಎಂಬುದು ಬ್ಲಾಗ್ ನ ಹೆಸರು

2 comments:

  1. chhang: Srikanth was so dissappointed he could not taste it when we had been to Gangtok. our driver kept talking on and on about it...:-)

    ReplyDelete