Sunday, April 3, 2016

ಅಂದರ್ ಕಿ ಬಾತ್ ಅಲಗ್ ಹೈ ಭಾಯಿ...

ಆ ಸಿನಿಮಾದ ಹೆಸರು ಹೋಗಿ ಬಾ ಮಗಳೇ. ಸಿನಿಮಾದ ಹೆಸರೇ ಹಾಗಿರುವುದರಿಂದ ಒಬ್ಬ ಪ್ರೇಕ್ಷಕನಾಗಿ ನಾನು ಏನನ್ನು ನಿರೀಕ್ಷೆ ಮಾಡಲು ಸಾಧ್ಯ ಹೇಳಿ. ಸಿನಿಮಾ ಹೋಗುವ ಮುನ್ನ, ಪೋಸ್ಟರ್ ನೋಡಿ ನಾವುಗಳು ನಮ್ಮ ನಮ್ಮ ತಲೆಗೆ ಬುದ್ದಿ ಕೊಟ್ಟೆ ಕೊಡುತ್ತೇವೆ. ಪೋಸ್ಟರ್, ಶೀರ್ಷಿಕೆ ಹುಟ್ಟು ಹಾಕುವ ನಿರೀಕ್ಷೆ ಗಳಿಗೆ ನೋಡಿದಂದಿನಿಂದ ಚಿತ್ರಮಂದಿರದ ಒಳಗೆ ಕುಳಿತು ಸಿನಿಮಾ ಶುರುವಾಗುವವರೆಗೂ ಆ ಸಿನಿಮಾದ ಮೇಲೆ ಅದರ ಕತೆಯ ಮೇಲೇ ನಮ್ಮದೊಂದು ಅಂದಾಜು ಇದ್ದೇ ಇರುತ್ತದೆ. ಹಾಗಾಗಿ ಹೋಗಿ ಬಾ ಮಗಳೇ ಎಂಬುದು ಒಂದು ಕೌಟುಂಬಿಕ ಚಿತ್ರವಾಗಿರುತ್ತದೆ, ಜೊತೆಗೆ ಸಿನಿಮಾದಲ್ಲಿ ತಂದೆ ತಾಯಿ ಮಗಳು ಮಾಡುವೆ ಮುಂತಾದ ಸೆಂಟಿಮೆಂಟ್ ಇರುತ್ತದೆ ಎಂದುಕೊಂಡಿದ್ದೆ. ಸಿನಿಮಮಂದಿರದ ಒಳಗಿದ್ದ ಅನೇಕ ಮಂದಿಯೂ ಹಾಗೆಯೇ ಅಂದುಕೊಂಡಿದ್ದರೆನೋ? ಆದರೆ ಸಿನಿಮಾ ಶುರುವಾಯಿತು ನೋಡಿ, ಇಡೀ ಚಿತ್ರಣವೇ ಬದಲಾಯಿತು. ಅದೊಂದು ಶೃಂಗಾರಮಯ ಸಸ್ಪೆನ್ಸ್ ಥ್ರಿಲ್ಲರ್ ಜೊತೆಗೆ ರಿವೆಂಜ್ ಇರುವ ಕತೆ. ಗೆಳೆಯ ಮತ್ತವನ ತಂಗಿಯನ್ನು ಕೊಂದವರ ಮೇಲೆ ಸೇಡು ತೀರಿಸಿಕೊಳ್ಳಲು ನಾಯಕ ಹಠ ತೊಡುತ್ತಾನೆ. ಮದುವೆಯಾದ ಮೊದಲ ರಾತ್ರಿ ನನ್ನದೊಂದು ಗುರಿ ಇದೆ, ಗುರಿ ತಲುಪುವವರೆಗೂ ಇದೆಲ್ಲಾ ಬೇಡ ಎನ್ನುತ್ತಾನೆ, ಅವಳು ಸ್ನಾನದ ಮನೆಗೆ ಹೋಗಿ ತಲೆತುಂಬಾ ತಣ್ಣೀರು ಸುರಿದುಕೊಳ್ಳುತ್ತಾಳೆ. ಇವನು ನೆಲಮಾಳಿಗೆಗೆ ಹೋಗಿ ಬಾಕ್ಸಿಂಗ್ ಪ್ರಾಕ್ಟೀಸ್ ಮಾಡುತ್ತಾನೆ. ಆನಂತರ ಬಾಕ್ಸಿಂಗ್ ಆಡಿ ಮೂವರನ್ನು ಕೊಲ್ಲುತ್ತಾನೆ, ಗುರಿ ತೀರಿತು, ನಡಿ ಹನಿಮೂನಿಗೆ ಎಂದು ಕರೆದುಕೊಂಡು ಹೋಗುತ್ತಾನೆ, ಅಲ್ಲೊಬ್ಬ ಪರಿಚಯವಾಗಿ ಅವಳ ಹಿಂದೆ ಬೀಳುತ್ತಾನೆ, ಫ್ರೆಂಡ್ ಆಗಿ, ನಾಯಕನನ್ನು ಫ್ರೆಂಡ್ ಮಾಡಿಕೊಂಡು ಸಮಯ ಸಾಧಿಸಿ ನಾಯಕನನ್ನು ಕೊಲ್ಲಲು ಸುಫಾರಿ ಹಂತಕನಿಗೆ ಡೀಲ್ ಕೊಡುತ್ತಾನೆ. ಒಂದು ಹಾಡಿನ ನಂತರ ಇಬ್ಬರೂ ಸೇರಿ ಅವನನ್ನು ಕೊಲ್ಲುತ್ತಾರೆ. ಆನಂತರ ಅಪಘಾತದಲ್ಲಿ ಗಾಯಗೊಂಡಿದ್ದ ಸುಫಾರಿ ಹಂತಕನನ್ನು ಕಾಪಾಡುತ್ತಾಳೆ ನಾಯಕಿ, ಅವನನ್ನು ಮನೆಗೆ ಕರೆತಂದು ಸುಶ್ರೂಷೆ ಮಾಡುತ್ತಾಳೆ, ಅಲ್ಲಿ ಅವನಿಗೆ ಅವಳ ಮೇಲೆ ಪ್ರೀತಿ ಹುಟ್ಟುತ್ತದೆ, ನಾಯಕಿಯೂ ಮನಸೋತು ತನ್ನ ಗಂಡನನ್ನು ಕೊಂದವನನ್ನು ಕೊಲ್ಲು, ಆಮೇಲೆ ಎಲ್ಲಾದರೂ ಓಡಿ ಹೋಗೋಣ ಎಂದಾಗ ಓಕೇ ಎಂದವನು ಸುಫಾರಿ ಕೊಟ್ಟವನನ್ನ್ನು ಫಿನಿಶ್ ಮಾಡುತ್ತಾನೆ. ಫಿನಿಶ್ ಮಾಡಿ ಮನೆಗೆ ಬಂದರೆ, ನಾಯಕಿ ಅವನನ್ನು ಕೊಲ್ಲುತ್ತಾಳೆ.
ಈಗ ಸಂಪೂರ್ಣ ಕತೆ ಹೇಳಿದ್ದೇನೆ, ಹೇಳಿ ಇದಕ್ಕೆ ಹೋಗಿ ಬಾ ಮಗಳೇ ಶೀರ್ಷಿಕೆಯನ್ನು ಒಪ್ಪಿಕೊಳ್ಳುವುದು ಹೇಗೆ...? ಇಲ್ಲಿ ಮಗಳಿಗೂ ಕತೆಗೂ ಸಂಬಂಧವೆ ಇಲ್ಲ ಎನಿಸುವುದಿಲ್ಲವೇ? 
ನಮ್ಮಲ್ಲಿ ಪ್ರೇಕ್ಷಕರನ್ನು ವಿಭಾಗಿಸುವುದು ಕಡಿಮೆ. ಹಾಲಿವುಡ್ ನಲ್ಲಿ ಬಾಲಿವುಡ್ ನಲ್ಲಿ ಪ್ರೇಕ್ಷಕರಿಗಾಗಿಯೇ ಸಿನಿಮಾಗಳು ನಿರ್ಮಾಣವಾಗುತ್ತವೆ. ಅಲ್ಲಿ ವಿಭಾಗಗಳಿಗೆ ಬೆಲೆ ಇದೆ. ನಮ್ಮಲ್ಲಿ ಅದಿಲ್ಲ. ಮಲ್ಟಿಪ್ಲೆಕ್ಷ್  ವೀಕ್ಷಕರಿಗೆ, ಥ್ರಿಲ್ಲರ್ ಪ್ರಿಯರಿಗೆ, ಆಕ್ಷನ್ ಪ್ರಿಯರಿಗೆ ಆಯಾ ಪ್ರೇಕ್ಷಕರನ್ನು ತಲೆಯಲ್ಲಿಟ್ಟುಕೊಂಡು ಸಿನಿಮಾ ಬರುತ್ತದೆ. ಅದರ ಪೋಸ್ಟರ್, ಟ್ರೈಲರ್ ಗಳು ಶೀರ್ಷಿಕೆಗಳು ಆ ಮೂಡ್ ಕಟ್ಟಿಕೊಡುತ್ತವೆ. ಪ್ರೇಕ್ಷಕರನ್ನು ಆ ಚಿತ್ರಕ್ಕೆ ತಯಾರು ಮಾಡುತ್ತವೆ. ಹಾಲಿವುಡ್ ನಲ್ಲಿ ಅದನ್ನು ಪಕ್ಕಾ ಮಾಡುತ್ತಾರೆ, ಅವರ ಟ್ರೈಲರ್ ನಲ್ಲೆ ಅದ್ಯಾವ ಕ್ಯಾಟೆಗರಿ ಚಿತ್ರ ಎಂಬುದು ಗೊತ್ತಾಗಿ ಬಿಡುತ್ತದೆ. ಅವರ ಸಿನಿಮಾ ನಿರ್ಮಾಪಕರ ಲಾಂಛನ ಬರುವಾಗಲೇ ಹಿನ್ನೆಲೆ ಸಂಗೀತ ಅವರ ಸಿನಿಮಾದ ಮೂಡ್ ಅನ್ನು ವಿಶದ ಪಡಿಸುತ್ತದೆ. ಅಲ್ಲಿ ಅಷ್ಟಾಗಿ ನೋ ಸರ್ಪ್ರೈಸ್. ಆದರೆ ನಮ್ಮಲ್ಲಿ ಆಗಾಗ ಸರ್ಪ್ರೈಸ್ ಬರುತ್ತವೆ. ಮಣಿಚಿತ್ರತಾಳ್ ನ ರಿಮೇಕ್ ಎಂದು ಗೊತ್ತಿರದೇ ಸುಮ್ಮನೆ ಆಪ್ತಮಿತ್ರ ಚಿತ್ರಕ್ಕೆ ಹೋದರೆ ಅದೊಂದು ಹಾರರ್ ಎಂಬುದು ಗೊತ್ತಾಗಿ ಅಚ್ಚರಿ ಪಟ್ಟವರಿದ್ದಾರೆ. ಏಕೆಂದರೆ ರಮೇಶ್, ವಿಷ್ಣುವರ್ಧನ್ ಮತ್ತು ಆಪ್ತಮಿತ್ರ ಚಿತ್ರದ ಶೀರ್ಷಿಕೆ ಇದಾವುದೋ ಗೆಳೆಯರ ನಡುವಣ ಸೆಂಟಿಮೆಂಟ್ ಕತೆ ಇರಬಹುದು ಎಂದುಕೊಂಡವರಿದ್ದಾರೆ. ಆದರೆ ಒಳಗಣ ಮರ್ಮ ಖುಷಿ ಕೊಟ್ಟದ್ದು ನಿಜ. ಹಾಗೆಯೇ ಶಿವಣ್ಣ ಅಭಿನಯದ ಅಂದರ ಬಾಹರ್ ನೋಡಿ ಅದರ ಪೋಸ್ಟರ್ ನೋಡಿ ನಾನಂತೂ ಇದು ಮಾಫಿಯಾ ಸಂಬಂಧಿ, ಡಾನ್ ತರಹದ  ಸಿನಿಮಾ ಇರಬಹುದು ಎಂದುಕೊಂಡಿದ್ದೆ. ಆದರೆ ಅದರಲ್ಲಿ ಸೆಂಟಿಮೆಂಟ್ ಜಾಸ್ತಿ ಇತ್ತು. ಮೊನ್ನೆ ಮೊನ್ನೆ ಬಂದ ಜೆಸ್ಸಿ ಚಿತ್ರದ್ದು ಅದೇ ಕತೆ. ಹೊರಗೆಲ್ಲಾ ತ್ರಿಕೋನ ಪ್ರೇಮಕತೆ ಎನಿಸಿದರೆ ಒಳಗೆ ಇದ್ದದ್ದು ಆತ್ಮದ ಕತೆ. ಒಳಗೆ ಹೋದರೆ ಅಚ್ಚರಿ. ಆದರೆ ಇಂತಹದ್ದೇ ಸಿನಿಮಾ ನನ್ನ ಟೇಸ್ಟ್ ಎಂದುಕೊಂಡು ಹೋದವನಿಗೆ ಮಾತ್ರ ಏರುಪೇರಾಗುವುದ್ದಂತೂ ಸತ್ಯ, ದಿನೇಶ್ ಬಾಬು ನಿರ್ದೇಶನದ ಅಮೃತವರ್ಷಿಣಿ ಚಿತ್ರದ್ದೂ ಅದೇ ಕತೆ. ಆಗೆಲ್ಲಾ ತ್ಯಾಗಮಯಿ ಎನಿಸಿಕೊಂಡಿದ್ದ, ತಾನೂ ಪ್ರೀತಿಸಿದ ಹುಡುಗಿಯನ್ನು ಧಾರಾಳವಾಗಿ ಬಿಟ್ಟುಕೊಡುವ ಗುಣದ ರಮೇಶ್, ಮತ್ತೊಬ್ಬನ ಹೆಂಡತಿಗೆ ಕಣ್ಣು ಹಾಕುವುದು, ಅದಕ್ಕಾಗಿ ಗೆಳೆಯನನ್ನೇ ಕೊಲ್ಲುವುದು ಆವತ್ತಿಗೆ ಊಹಿಸುವುದು ಸಾಧ್ಯವಿತ್ತೆ..?
ನಮ್ಮಲ್ಲಿ ಸಿನಿಮಾದ ಗತಿ ಬಗ್ಗೆ ಕೂಡ ಹೆಚ್ಚು ಚಿತ್ರಕರ್ಮಿಗಳು ತಲೆಕೆಡಿಸಿಕೊಂಡಿದ್ದು ಕಡಿಮೆ. ಒಂದು ಸಿನಿಮಾ ಅದರ ಕತೆಗೆ ತಕ್ಕಂತೆ ಚಿತ್ರಿಕೆ ಸಂಯೋಜನೆ ಪಡೆಯುತ್ತದೆ. ಹಾಗಾದಾಗಲೇ ಅದರ ಸಿನಿಮಾ ಪರಿಣಾಮಕಾರಿ ಎನಿಸುವುದು. ಮೂಡ್ ಕಟ್ಟಿಕೊಡುವುದು. ಗಾಡ್ ಫಾದರ್ ಸರಣಿಯನ್ನು ಗಮನಿಸಿದರೆ ಗೊತ್ತಾಗುತ್ತದೆ. ಆದರೆ ನಮ್ಮಲ್ಲಿ ಅದೇಕೋ ಏನೋ ಅದರ ಬಗ್ಗೆ ಯೋಚಿಸುವವರು ಕಡಿಮೆ. ಉದಾಹರಣೆಗೆ ಇತ್ತೀಚಿಗೆ ನಮ್ಮಲ್ಲಿ ಡ್ರೋನ್ ಬೆಲೆ ಕಡಿಮೆಯಾಗಿರುವುದರಿಂದ ಸಿನಿಮಾಗಳಲ್ಲಿ ಸುಖಾಸುಮ್ಮನೆ ಪಕ್ಷಿನೋಟದ ಶಾಟ್ ಇರುತ್ತದೆ. ಹಾಗೆಯೇ ಪ್ರಯೋಗಾತ್ಮಕವಾಗಿ ಸಿನಿಮಾ ಮಾಡೋಣ ಎಂದುಕೊಂಡು ಸಂದಿಗೊಂದಿಗಳಲ್ಲಿ ಕ್ಯಾಮೆರಾ ಇಟ್ಟು ಶೂಟ್ ಮಾಡಿದವರೂ ಇದ್ದಾರೆ. ಇದೆಲ್ಲಾ ತಪ್ಪು ಎನುವುದಲ್ಲ. ಬದಲಿಗೆ ಅಗತ್ಯ ಇತ್ತೇ ಎನ್ನುವುದು ಪ್ರಶ್ನೆ.
ಸಿನಿಮಾದ ಶೀರ್ಷಿಕೆಯಿಂದ ಮೊದಲ್ಗೊಂಡು poster, ಛಾಯಾಗ್ರಹಣ,  ಶಾಟ್ ಸಂಯೋಜನೆ, ಹಿನ್ನೆಲೆ ಸಂಗೀತ ಮುಂತಾದವುಗಳ ಮೂಲಕ ಸಿನಿಮಾ ಕಟ್ಟಿಕೊಡಬೇಕು ಮತ್ತು ಪ್ರೇಕ್ಷಕನನ್ನು ಆ ಚಿತ್ರಕ್ಕೆ ತಯಾರಿಗೊಳಿಸಬೇಕು. ಹಾಗಾದಾಗ ಪ್ರೇಕ್ಷಕ ತಯಾರಾಗುತ್ತಾನೆ. ಸರ್ಪ್ರೈಸ್ ಎಂದಾಗ ಸಿನಿಮಾ ಅಷ್ಟೇ ಚೆನ್ನಾಗಿದ್ದು ಅವನನ್ನೂ ಮೆಚ್ಚಿಸುವಂತಿರಬೇಕು. ಅದಿರಲಿ. ನೀವು ಕೂಡ ಅಂದುಕೊಂಡಿದ್ದು ಬೇರೆ, ಒಳಗೆ ತೋರಿಸಿದ್ದು ಬೇರೆ ಅನುಭವಕ್ಕೆ ತುತ್ತಾಗಿದ್ದೀರಾ..?